Víctor Martínez Loredo ye doctor en psicoloxía, espertu en conductes adictives.

Una de les noticies que más llamó l’atención na creación del nuevu gobiernu, amás del so evidente xigantismu, ye la creación d’un Ministeriu de Consumu. Esti nuevu ministeriu, dirixíu pol líder d’Izquierda Xunida Alberto Garzón, ye la primer cristalización de la promesa electoral de Xuníes Podemos sobro la regulación del xuegu d’apuestes, xera que se va enfrentar a delles dificultaes.

Per un llau, les competencies en materia de xuegu presencial tán íntegramente cedíes a les comunidaes autónomes. La única esceición ye la de los apuestes xestionaos pola ONCE y la de la Sociedá Estatal de Lloteríes y Apuestes del Estáu (SELAE). Esto ye, son les comunidaes autónomes les encargaes de llexislar, reglamentar y executar actuaciones relatives a casinos, bingos, sales d’apuestes, etc. Por casu, n’Asturies, esta lexislación recuéyese na Llei 3/2001 de Xuegu y Apuestes. Esti fechu ye importante una y bones los datos epidemiolóxicos compartíos pol Plan Nacional Sobro Drogues indiquen una medría na prevalencia de xuegu presencial na población española ente 14 y 18 años (d’un 20.6% en 2014 o un 13.6% en 2016 a un 22.7% en 2018). Esta medría, anque menor, tamién s’atopa na canal online, competencia esclusiva del estáu (10.2% y 6.4% vs 10.3%), siendo tamién una canal mayoritariamente utilizada por xente mozo d’ente 25 y 34 años (5.8% de prevalencia nesta estaya comparanza col 3.5 poblacional).

Esta cesión lexislativa a les comunidaes, anque problemática, nun dexa ensin marxe d’acción al nuevu ministeriu: una de les xeres más importantes y demandaes dende distintos ámbitos ye la regulación de la publicidá sobro xuegu nes distintes canales. Cuando se piensa en lleis que regulen la vienda, distribución, consumu o publicidá d’actividaes potencialmente adictives, lo más común ye pensar na llei 28/2005 de midíes sanitaries frente al tabaquismu y reguladora de la vienta, el suministru, el consumu y la publicidá de los productos del tabacu, más conocida como la llei anti-tabacu. A pesar de les llimitaciones de dicha llei y del marxe de meyora de la mesma, ensin dulda el nuevu ministeriu atinaría si consiguiera delinear una regulación de la publicidá nel xuegu que siguiera’l patrón del capítulu III de la llei anti-tabacu.

Anque esto podría allanar el camín pa la regulación de la publicidá en xuegu, esisten delles torgues a superar. Per un llau, cuando se piensa en “la publicidá sobro’l xuegu”, viennos a la cabeza les frases machacones y repetitives de distintes empreses encamentándonos a xugar o les imaxes de famosos amosando les ventayes de xugar al póker o apostar al bingu. Sicasí, quiciabes una de les campañes de publicidá más conocíes, recordaes y esperaes de too l’añu ye l’anunciu de la Llotería de Navidá. ¿va haber esceiciones pa la Llotería de Navidá y otros xuegos de la SELAE? ¿y de la ONCE? L’estáu nun ye propietariu de nenguna empresa tabacalera; tampoco de nenguna empresa de la industria alcoholera. Sicasí, esiste toa xuna variedá de xuegos d’apuestes en forma de quinieles y lloteríes que ye propiedá estatal, y tien de decidise si la llei de regulación de la publicidá va cuntar con esceiciones nesti sentíu. ¿va ser el final d’esa melodía machacona que viende felicidá, familia y esperanza?

Ye verdá que les característiques estructurales de les quinieles y lloteríes faen qu’esti tipu de xuegu d’apuestes tenga un potencial adictivu prácticamente nulu y quiciabes ye nesti sentíu nel que podría regulase les cuestiones relatives al xuegu (en función de felicidaes característiques pa incentivar l’amenorgamientu del poder adictivu de les distintes actividaes). Sicasí, esto non solo nun torga los anuncios de ciertos xuegos de cartes sinón que dexaría fuera del focu xuegos d’apuestes que nun s’anuncien pero que suponen unu de los mayores problemes adictivos: les máquines tipu B o tragaperres, de les que se va falar n’otru momentu. Per otru llau, tampoco habría qu’escaecer qu’esiste lexislación autonómica que yá regula la publicidá del xuegu (anque nun sía nun ámbitu nacional como ye la televisión) y que’l nuevu gobiernu podría utilizar en función del efectu consiguíu en cada comunidá. Por poner un exemplu cercanu, la llei de xuegu d’Asturies yá indica, nel so artículu 12, que la publicidá ha ser puramente informativa, entendiendo por ello: el nome comercial, los xuegos que se practiquen nel establecimientu, los servicios que s’empresten y los cartelos informativos de situación. Eso sí, tamién s’afita que la publicidá nel interior de los locales ye “llibre”; una de cal y otra de sable.

Otres de les torgues a les que se va enfrentar tanto la regulación sobro la publicidá como sobro’l mesmu xuegu ye la presión de la industria del xuegu y otros actores políticos. D’un llau, la presión indirecta al traviés de la promoción de la moderación, l’amenorgamientu de dañu y usu responsable (“xuega con moderación”), que mueve la responsabilidá de los efectos gafos de tala actividá a les persones consumidores. Obviamente, nunca se promociona’l xuegu o usu responsable nes actuaciones de la empresa. Daqué asemeyao asocede col alcohol onde la industria alcoholera promociona un usu responsable de los sos productos y la protección del procesu de producción por aciu les DOP, ente otres midíes, p’autu-imponese llimitaciones (beneficioses pal sector) primero que sía’l mesmu estáu quien lo faiga (“bebe con moderación, ye la to responsabilidá”). Efectu de too ello ye unu de los impuestos al alcohol más baxu del mundu. Les patronales del alcohol y del xuegu aprendieron la llección de la regulación del tabacu y dambes tán presentes nes polítiques de xuegu responsable. Por supuesto, tamién ta la presión directa, amplificada por ciertos sectores políticos y mediáticos, énte les midíes destinaes a amenorgar l’impactu negativu de les actividaes d’apuestes. Principalmente, este playing the nazi card dase énte los intentos de llevar alantre midíes de prevención ambiental, aludiendo a la merma de la llibertá individual de les persones pa destinar el so tiempu (y dineru) a les actividaes que-yos preste. Yá se va encargar la industria del xuegu de facer que-yos preste apostar.

Pin It on Pinterest

Share this
X