Pedro Roldán García es Presidente de la Sociedad Cultural Gijonesa
L’artículu 23 de la Declaración Universal de los Derechos Humanos de 1948 establez que toa persona tien derechu a un trabayu que garantice una esistencia acordies cola dignidá humana.
Nun ye casualidá que se recueya ente los derechos fundamentales el derechu a un trabayu decente y dignu. El trabayu, la capacidá de tresformar los recursos naturales pa producir los medios materiales d’esistencia, ye una característica definitoria del ser humanu. El desenvolvimientu de les democracies contemporanees, gracies a la llucha histórica de les clases trabayadores, complementó les llibertaes civiles clásiques cola reconocencia formal de los derechos sociales y llaboral.
Un mercáu llaboral decente ye una condición imprescindible por que puedan desenvolvese dafechu los principios democráticos. Pero nes últimes décades, la hexemonía de les polítiques neolliberales impulsó la desregulación del mercáu llaboral, retayando derechos y enanchando la fienda de la desigualdá, socavando asina los cimientos de la mesma democracia.
Esta fonda desigualdá y una precariedá crónica son les notes predominantes del nuestru mercáu llaboral. La mocedá ve como se-y torga’l desenvolvimientu personal, al escarecer d’unes mires de futuru mínimamente ilusionantes, xenerándose una fonda frustración que se traduz nuna fola de desafección creciente, que va royendo les instituciones y les bases de la convivencia. Asitiar nel centru del alderique social, políticu y cultural el derechu a un trabayu decente nun ye puramente una reivindicación lexítima, sinón que ye l’auténtica vacuna contra la creciente pandemia d’odiu, que se nutre del mieu énte un futuru faltu de certidumbres.
El movimientu asociativu cultural asturianu nun podía permanecer ayenu énte esta realidá. Poro, trés entidaes culturales con una dilatada hestoria esconxuremos p’alzar les nuestres voces pol derechu a un trabayu decente y dignu.
El próximu día 23 de payares, nel Teatru Filarmónica d’Uviéu, diversos representantes del mundu cultural van xunir les sos voces a la d’artistes como Jerónimo Granda, Nuberu o Luis Pastor; pero tamién a les de los secretarios xenerales d’UXT y CCOO: Pepe Álvarez y Unai Sordu. El mundu de la cultura y el mundu del trabayu caminen xuntos una vegada más n’Asturies, pola defensa d’un trabayu decente, pola defensa de la dignidá humana, pola defensa, a la fin, de la xusticia social y la democracia.
La Sociedá Cultural Xixonesa, la Ciudadana d’Uviéu y Amigos de Mieres consideramos qu’ésti ye’l momentu históricu pa empezar a construyir la esperanza, revirtiendo décades de precarización llaboral y de restricción de derechos, precisamente agora cuando se ta aldericando una reforma llaboral que tien d’afitar les bases d’un modelu llaboral decente. L’amenorgamientu de la temporalidá y la recuperación del papel de los sindicatos na negociación colectiva tienen de ser la columna vertebral d’una reforma que modernice’l nuestru mercáu de trabayu, asitiándolo nel derechu a un trabayu decente como garantía fundamental d’una sociedá más xusta, que ponga los cimientos d’un proyectu de país dignu.