“No hay país. Crónica política (y sentimental) de Asturias (1975-2022)” ye un percorríu pelos principales acontecimientos de la historia recien d’Asturies, ente la muerte de Franco y la descarbonización. Ente Rafael Fernández, el primer presidente del Gobierno preautónomicu, y Rodrigo Cuevas, el músicu y axitador cultural de ligueru y montera, concéntrase l’últimu mediu siglu d’esta tierra. Asturies recuperó la so vida democrática coincidiendo col regresu de Rafael Fernández, antiguu miembru del Conseyo Soberanu d’Asturies y Llión que coló pal esiliu en 1937. A la vuelta, Fernández topó una tierra con una industria pesada  relevante entá y una lleenda de resistencia nel franquismu. En el 2018 la minería peslló y agora les principales lleendes son les urbanas, abocaes a la emigración. Entrín y non, cuatro décades llargues d’ensayos y erros nes qu’Asturies paez que nun alcontró  una nueva identidá tras del esbarrumbe del movimientu obreru que la encadarmaba. El periodista Xuan Cándano quixo enllenar un incomprensible vacíu ensayísticu sobre la evolución d’esti requexu del Atlánticu y el resultado ye “No hay país. Crónica política (y sentimental) de Asturias (1975-2022)”. Un averamientu rigurosu al pasáu recien de la nuestra tierra pal que entrevistó a más de un cientu de los sos protagonistes y consultó de con fondura les fontes documentales. Xuan Cándano (San Esteban de Bocamar, 1959) ye periodista. Trabayó en periódicos (Unidad, de San Sebastián, La Voz de Avilés, La Voz de Asturias, Hoja del Lunes, de Oviedo, Diario 16), radio (Radio Asturias SER), televisiones (RTVE) y axencias informatives (EFE, OTR Press). Foi tamién xefe de Prensa de la Universidá d’Uviéu y entamó nos años noventa la productora televisiva d’informativos Bocamar. Fundó y dirixó diez años la revista d’investigación periodística y pensamientu Atlántica XXII. Dende los sus anicios profesionales hasta anguaño collabora n’otros munchos medios