Pedro Roldán, presidente de la Sociedá Cultural Xixonesa
Una defensa de la solidaridá interterritorial
El prealcuerdu ente’l PSC y ERC pa la posible investidura de Salvador Illa como president de la Generalitat inclúi, ente otres cuestiones polémiques, la salida de Cataluña del Sistema de Financiamientu Autonómicu Ordinariu pa pasar a unu similar al sistema de cupu del País Vascu o Navarra. Ello implicaría que Cataluña tendría una facienda propia, que s’encargaría de recaldar, inspeccionar y xestionar la totalidá de los tributos, cola consiguiente medría de la so capacidá de financiamientu a cuenta de la d’otros territorios. Convien destacar qu’esti alcuerdu, axustáu de manera opaca ente dos fuerces polítiques catalanes, fuera de los ámbitos parlamentarios, inclúi elementos qu’afecten de manera significativa al corazón del modelu territorial español. L’Estáu Social encóntase nun principiu de redistribución de la riqueza, al traviés d’un sistema fiscal progresivu, con cuenta de garantizar los principios democráticos d’Igualdá, Cohesión y Solidaridá. Esti principiu opera tantu ente les distintes clases sociales como ente los territorios, porque la riqueza y la capacidá económica de les distintes comunidaes autónomes obedez a factores estructurales y hestóricos, de la mesma manera que la desigualdá de clase. La quiebra de la solidaridá interterritorial diba enanchar les asimetríes del Estáu, perxudicando a la ciudadanía de les comunidaes menos boyantes, socavando la cohesión, cebando los conflictos territoriales y la desafección política. No fondero de tou esti alderique apruz el vieyu lema “Espanya ens roba”: el camientu de que la riqueza d’un territoriu nun vien de factores xeográficos, hestóricos y políticos sinón d’unes supuestes virtúes d’empredimientu que lo estremaríen d’otros territorios, con idiosincrasia dada a la folgancia, a los que se ve forzáu a financiar colos sos impuestos. Estos argumentos, más propios d’un youtuber andorranu que de fuerces progresistes y d’esquierdes, beben del mesmu pensamientu neolliberal que remana la Comunidá de Madrid pa xustificar la so dumping fiscal frente al restu d’España. Frente a esto, tenemos qu’alzar la voz en defensa de la igualdá, d’una política fiscal progresiva, capaz de garantizar los derechos sociales, los servicios públicos y unes condiciones de vida equitatives pa cada persona del nuesu país. Como dicía Rousseau: “que naide sía tan ricu como pa poder mercar a otru y que naide sía tan probe como tener que vendese”. Por ello fai falta que’l conxuntu de la sociedá asturiana, col Gobiernu d’Asturies a la cabeza, se movilice en defensa de la solidaridá ente los territorios d’España y de una facienda única, garante de la equidad y verdadera base de la Xusticia Social.