Presentación

La SCG ye una entidá ensin ánimo d’arrequecimientu que funciona col trabayu voluntariu de los sos directivos y socios.

Dende 1968 llevamos siendo un referente en Xixón pa la cultura crítica y popular. La nuestra asociación ye heredera de la tradición de los ateneos obreros, y como tal, intentamos caltener el so espíritu a lo llargo d’esti mediu sieglu d’esistencia.

¿A qué nos dedicamos?

Charres, alderiques, conferencies, ciclos de cine, conciertos o esposiciones, la Cultural emplaga tolos preseos pa esparder la cultura y l’espíritu críticu en tolos ámbitos de la ciudá. 

Collaboramos con otres entidaes xixoneses n’actividades como el “Aula Popular José Luis García Rúa”, na recuperación de la Memoria histórica y social n’actos como los del 14 d’Abril, o los homenaxes a Rosario Acuña y los asturianos que morrieron nos campos de concentración nazis. 

Entamamos xornades de análís social o históricu como les dedicaes a la Cayida de la Muria en 2009, les xornaes sobre’l ferrocarril, sobre la infancia o sobre urbanismi al filu de la aprebación del PXOU. 

Llevamos collaborando activamente col Festival Internacional de Cine de Xixón (FICX) ya dende hai años, como un de los eventos culturales más importantes de la ciudá y tamién cola Selmana Negra.

Otra de les nuestres actividaes que ya tien continuidá ye “Okupa la ciudá”, con 2 fines de selmana añales de charres -les más de les veces sobre temes artísticos-, conciertos y recitales de poesía, en llugares insólitos o alternativos, siempre de la mano de la editorial “Suburbia Ediciones”.

Pelos nuestros espacios tuvieron periodistes como Esteban Hernández, Jesús Maraña, Ana Pardo de Vera, Antón Losada, Enric Juliana, Rafael Poch de Feliu o Nanzanin Armanian; personalidaes venceyaes al pensamientu como César Rendueles, López Arnal, Clara Serra; economistas como Yayo Herrero, Begoña Cueto, Alberto Montero o Manuel Escuedero; políticos como Carolina Besacana, Alberto Garzón, Cristina Narbona, Manuela Carmena, Julio Anguita o Pedro de Silva; xuristes como Paz Andrés, Javier Pérez Royo; artistes como Luis Delgado, Antonio Fraguas “Forges” o Igor Paskual, etc

 

Pin It on Pinterest

Share This
X