Presenta : Ovidio Rozada. Directivu de la Sociedá Cultural Xixonesa. Xueves 23 de mayo. 19:00 hores. Local de la Sociedá Cultural Xixonesa. 2° Planta Escuela Comercio. Organiza : SOCIEDAD CULTURAL GIJONESA.

¿Tamos entamando’l camín a la Tercer Guerra Mundial? La entruga nun ye a lo xole; la historia muéstramos otros exemplos del aniciu de grandes guerres cuando el hexemón del momentu empecipiaba a tornar y surdíen otres fuerces que-y arrampuñaben poder y mercaos. Y este ye güei el casu: EEXX empecipió un claru cayente nes últimes décades, mientres otres potencies remanecíen con fuerza. China, pero tamién los BRICS, tán moviendo’l centru del mundu escontra Oriente, daqué qu’EEXX nin quier nin puede dexase, pos al llargu plazu esi desplazamientu puede acabar col poder de la so moneda, el dólar, y por tantu cola so posición de superpotencia dominante a nivel mundial. Ello ye que podría considerase que la guerra empezó va tiempu, pero que s’aceleró colos acontecimientos que desaguaron cola guerra n’Ucrania y, más apocayá, col xenocidiu que llevó a cabo Israel en Gaza col respaldu d’EEXX, amás del conflictu permanente nel Sahel y les tensiones en redol a Taiwan. Y a tollo hai qu’amestar qu’en medios militares y políticos, tantu rusos como occidentales, empezar a falar con ciertu remangu de la posibilidá d’un conflictu nuclear, y pásase a valorar la magnitú de la catástrofe como eventualidá posible. La entruga, pos, ye pertinente. ¿Tamos entamando’l camín escontra una Tercer Guerra Mundial? Nesti llibru diversos autores respuenden a esa entruga, y traten de delimitar qué barganal tamos d’ella.