Dende la Sociedá Cultural Xixonesa queremos espresar el nuestru apoyu dafechu a la iniciativa entamada por Asturias Socialista, y soscrita por delles entidaes culturales, sociales, sindicales y polítiques de Xixón, pa la sustitución del nome de l’Avenida Juan Carlos I del caleyeru de la nuestra ciudá.
Una ciudad como Xixón nun puede consentir qu’una persona investigada xudicialmente por delitos presuntamente cometíos de corrupción y evasión fiscal enforma graves, qu’amás con carácter continuáu, ostente l’honor de tener una avenida col so nome.
Poro, consideramos que’l conceyu de Xixón ha entamar darreo’l procesu pa la eliminación de la so denominación actual, contando pa ello cola máxima participación de les asociaciones vecinales implicaes, faciendo por evitar les posibles molesties qu’un cambiu tan necesariu pudiera trayer pa los vecinos que representen.
Xixón, 4 de Agosto de 2020.
Xunta directiva de la Sociedá Cultural Xixonesa