Álvaro Sánchez García,  ye politólogu miembru de SOCyL

El pasáu 28 d’avientu, el Conceyu de Llión reabrió una ferida, qu’igual nun se zarrara primero; la negación autonómica lleonesa. Inda primero de la creación del Estáu de les Autonomíes en 1983, Castiella y Llión foi motivu d’intensos alderiques. Alderiques que, como amuesa la moción municipal, 40 años dempués, tovía nun se pesllaron.

El conocíu como País Lliones ye la hestoria d’alcuentros y desalcuentros con Castiella. Según quien fuera’l rexidor n’España, los sos caminos diben xuntase o dixebrase. La última alcordanza preconstitucional, na dictadura franquista, los mapes que s’enseñaben nes escueles estremaben culturalmente – que non administrativamente – a Llión de Castiella la Vieya.

En 1983, cola creación del actual Estáu de les Autonomíes púnxose’l puntu y final a esta etapa; Llión y Castiella formaron xuntes, la Comunidá Autónoma de Castiella y Llión. Los «llionesistes» cháronse a les cais énte esti ultraxe, y el 4 de mayu de 1984, fueron quien a  axuntar a cuasi 90.000 persones col lema «Llión solu». D’entós p’acá esti movimientu, nun estáu latente, dio en dos partíos políticos: la Unión del Pueblu Llionés (UPL) y el Partido Rexonalista del País Lleonés (PREPAL).

El mes d’avientu pasáu, sicasí, cola yá mentada moción, esti movimientu resurdió. ¿Cuálos son los motivos de fondu d’esti resurdimientu? Principalmente son fundamentos de calter económicu. Y ye que, como pudimos ver nes movilizaciones del 16F, la mayoría de los asistentes reclamaben un “futuru dignu” pa Llión al empar que portaben la bandera del País Lliones.

Nel so orixe, les movilizaciones de la década de los 80 yeren, un rexonalismu cultural y identitariu dafechu, onde s’arengaba un fechu históricu diferencial. Esixíase, poro, el respetu a una rexón histórica que coesistiera con Castiella. Y más tovía cuando a Cantabria – que sí perteneciera a Castiella – sí se-y reconoz el derechu a l’autonomía.

El rexonalismu que predomina anguaño avérase más a un rexonalismu económicu. Una idea entamada dende les élites pa fuxir de dacuala responsabilidá nos nefastos resultaos económicos – y tamién demográficos –. Ye, en resumíes cuentes, un rexonalismu utilizáu más como un mediu que como un fin.

Alcontramos, de cara a la opinión pública, dos posibles discursos per parte de llionesistes; el «Valladolid róbanos» o «la identidá de los lleoneses nin ta nin va tar nunca venceyada a la de Castiella y Llión» (Eduardo López, vocera de la UPL nel Conceyu de Llión). El primeru escuende un mensaxe probe y verdaderamente egoísta, mentes que, el segundu aguarda un tresfondu razonable y lexítimu.

Anguaño Llión sufre los mesmos problemes non solo que Zamora y Salamanca, sinón tamién que Soria, Segovia, Ávila, Palencia, Burgos o otres Comunidaes Autónomes que llinden como Asturies o Galicia. La despoblación, falta d’industria, l’amenorgamientu de l’actividá industrial y falta d’oportunidaes llaborales son un problema rellacionáu col modelu económicu y productivu, un problema de la España vaciada o de la España periférica si utilizamos el conceutu que Christophe Guilluy utiliza pal casu francés. Amparase, asina, nesti tipu de mensaxes rexonalistes nun faen sinón desamparar a la otra parte. Poro, el LEXIT (anglicismu a la BREXIT pa referise a la secesión de Llión) nun soluciona, cola situación actual nada, cenciellamente vamos tener dos Comunidaes Autónomes distintes, pero colos mesmos problemes.

Twitter: @AlvaroSanchez_1

Pin It on Pinterest

Share this
X