Manuel Maurín Álvarez ye profesor titular de Análisis Rexonal de la Universidá d’Uviéu
Trés crisis grandes españaron darréu nos últimos años: la económica, la climática y, p¡acabar, la sanitaria. Caúna d’elles por separáu y toes en xunto (como una crisis global) apunten al ocasu del sistema capitalista dominante, siquier na so versión más radicalizada y neolliberal, de la qu’abren camín pa enfilar el desmontaxe y la reestructuración fonda de munchos de los sos componentes estructurales, ente ellos los que se manifiesten nel planu territorial y urbanístico,
N’efectu, con estes crisis rescamplen les contradicciones fondes d’esi sistema y les sos consecuencies devastadores na sociedá y la naturaleza, pero faciliten tamién la llectura de les claves que dexen dirixir el procesu del cambéu na dirección afayadiza. Una dirección que tien de alloñar lo más posible del aldu precedente, pero que nun puede desentendese de les mancaures heredaes nin desendolcase, a curtiu o mediu plazu, n’otru contestu que nun sía’l de la mesma crisis.
Dende’l puntu de vista urbanísticu la crisis económica de la primer década del sieglu caracterizóse, especialmente n’España, pola xeneración d’un inmensu escedente de suelu, infraestructura, equipáu y vivienda (“la burbuya del lladriyu”) que terminó colapsando’l sistema financieru, dedicáu los años primero na inversión y la especulación inmobiliaria. Y too nun contestu ultraliberal de desregulación de la normativa urbanística, d’ausencia de tresparencia y de corrupción xeneralizao.
El fundimientu del sector de la construcción y les obres ensin afechar, la delda privada que se trespasó al sector públicu, los desahucios, l’aumentu de la precariedá y la esclusión, son les buelgues más evidentes y dolioses d’aquella crisis y dellos organismos internacionales amosaron al traviés de diversos documentos (como l’Axenda 2030 de la ONU o la Nueva Axenda Urbana Hábitat III) cualos tendríen de ser les directrices pa un nuevu urbanismu sostenible que superara definitivamente esa etapa nefasta: contención del crecimientu descomanáu, prioridá de les actuaciones de rexeneración y rehabilitación con nuevos modelos habitacionales, inclusión social y de xéneru o participación ciudadana nel diseñu de les ciudaes y de la sociedá nes plusvalíes de l’actividá urbanística (que tamién se recueye nel artículu 47 de la Constitución Española), ente otres.
Lóxicamente, la cuestión ambiental tamién ocupa un llugar central na estratexa pa superar el modelu heredáu del desarrollismo, pero ganó entá mayor impulsu según avanzaba la conocencia sobro’l cambéu climáticu, la constatación del so agravamientu aceleráu y de los sos efectos a nivel mundial y en cada país.
Na llucha contra la crisis climática les tresformaciones urbanes tienen una importancia especial, tantu para amenorgar la emisión de gases d’efectu invernaderu col cambéu del modelu de xeneración (enerxía anovable), l’adaptación de les edificaciones pal aforru (“passive house” ) y el cambéu de les pautes de consumu enerxéticu, como mediante procesos de sustitución d’infraestructura gris por sistemes integraos d’infraestructura verde que dexen la retención de carbonu, la mitigación de los efectos d’isla térmica” o de los previsibles inundaciones.
La crisis sanitaria tamién empieza a apurrir enseños que tendrán de ser incorporaos na planificación futura de les ciudaes y del territoriu. Frente a la dispersión, la estrema división espacial del trabayu y la deslocalización va facer bona falta garantizar l’autoabastecimientu de bienes y servicios en periodos d’emerxencia y dar un impulsu definitivu a la producción y comercialización de proximidá, la soberanía alimentaria o la implantación de les práctiques de metabolismu urbanu y economía circular.
Ente tolos componentes qu’afiten el modelu urbanu alternativu destaca finalmente’l que tien un calter más tresversal ya integrador, el de la movilidá; sobremanera la de llarga distancia, pero tamién la d’escala rexonal o metropolitana y, especialmente, la que menos sostenible resulta dende’l puntu de vista económicu, ambiental y de la salú: l’automóvil particular, l’aviación y los grandes buques.
L’oxetivu del amenorgamientu de la movilidá y del so cambéu modal afecta de manera sustancial al sistema económicu, social y territorial (especialmente n’actividaes mundializaes y en sectores como’l del turismu de mases o’l tresporte de mercancíes) y tendría notables efectos sobro la configuración del modelu de producción, de distribución y d’ociu. Poro ye una cuestión de suma importancia y una piedra angular pa la trasformación sustancial del modelu urbanu en toles escales.
Uviéu 16/04/2020