El vienres 13 d’avientu la Sociedá Cultural Xixonesa celebró la entrega del Premiu Juan Ángel Rubio Ballesteros 2019 nel salón d’actos de la Escuela Comerciu.

Nel so XXVI edición el xuráu decidió la concesión del galardón a l’Asociación Asturiana de Solidaridá col Pueblu Saharagüi en reconocencia al importante llabor que lleva realizando dende la so fundación, fai yá más de 30 años, en defensa de los derechos del pueblu saharagüi.

De siguío reproducimos el discursu d’entrega del premiu:

Énte la entrega’l XXVI premio Juan Ángel Rubio

Güei 13 d’avientu la Sociedá Cultural Xixonesa fai entrega del Premiu Juan Ángel Rubio Ballesteros, qu’esti añu recayó na Asociación Asturiana de Solidaridá col Pueblu Saharagüi.

El galardón qu’otorga añalmente la nuesa entidá algama anguaño la so XXVI edición. Honra la memoria d’unu de los nuesos socios más destacaos, quien presidió la Sociedá Cultura Xixonesa mientres dellos años. Juan Ángel Rubio Ballesteros foi un destacáu odontólogu que fixo una importante llabor sociu-sanitaria en Xixón. Mientres la Guerra Civil española sirvió como capitán del exércitu republicanu. Exiliáu en Francia al términu de la Guerra, acabó recluyíu nel campu de concentración de Argelés. Llegáu a Xixón en 1944, participó na oposición política al franquismu como militante del PCE, arreyándose sobremanera nel activismu cultural y social de la nuesa ciudá.

L’Asociación Asturiana de Solidaridá col Pueblu Saharagüi lleva trés décades denunciando la sangrante situación del Sahara y del pueblu saharagüi, la brutal ocupación y hostigamiento que vieno sufriendo per parte del gobiernu de Marruecos. El pueblu español caracterizóse siempres por ser un pueblu solidariu, cuantimás la sociedá asturiana y xixonesa.

El casu del Sahara ye una mancha na conciencia colectiva española y un de los heriedos envelenaos de la colonización europea d’África. Mientres el final del réxime franquista, en 1975, producióse la Marcha Verde, impulsada por Hassan II nun contestu de fuertes tensiones internes del propiu reinu marroquín, que cuntó col beneplácito d’EEXX y Francia. L’añu antes, por presiones de la ONU y ante l’actividá del Frente Polisariu que combatía pola lliberación del Sahara, la dictadura franquista aportara a la celebración d’un referéndum pal Sahara Español. Tres la Marcha Verde, pa la que Hassan II movilizó a más de 50.000 civiles pa ocupar el territoriu saharagüi, amás d’un contingente militar, el referéndum quedó paralizáu. L’agonizante regimen franquista robló entós los Alcuerdos Tripartitos de Madrid, polos que dexaba la soberanía sobro’l territoriu a Marruecos, Mauritania y a una asamblea tribal de notables que tenía de representar al pueblu Saharagüi. Foi una decisión d’esta asamblea tomada n’El Aiún en 1976, a la que s’enferronaríen Marruecos y Mauritania pa dar en l’anexón de los territorios del Sahara. El Frente Polisariu reaccionó entós legitimamente proclamando en xineru de 1976 la República Árabe Saharagüi Democrática.

Les Naciones Xuníes y los resolvimientos de los tribunales internacionales nun reconocieron los Alcuerdos de Madrid y vienen esixendo que’l pueblu saharagüi pueda pronunciase al traviés d’un referéndum d’autodeterminación. España, antigua potencia colonial que, a güeyos de la ONU, sigue siendo l’alministradora formal del territoriu, dexó a la so suerte a la población, desabriéndose dende entós de la so responsabilidá histórica.

Como en tantos conflictos, la parte más débil, nesti casu’l pueblu saharagüi, ye sistemáticamente entartallada por un complexu y descarnáu xuegu d’intereses. Ye de xusticia que’l pueblu saharagüi pueda decidir llibremente’l so futuru y gociar d’un réxime de plenes llibertaes.

El papel xugáu mientres estos años por organizaciones como l’Asociación Asturiana de Solidaridá col Pueblu Saharagüi foi clave pa evitar qu’una inxusticia historica tan evidente cayera nel olvidu. Llabores tan importantes como’l programa de “vacaciones en paz” dexen cada añu a ensame de neños y neñes esfrutar d’una dignes y merecíes vacaciones en tierres asturianes.

Por toos estos motivos güei queremos premiar a quienes caltuvieron viva la voz d’un pueblu que dende miles de kilometros de distancia clama pola so llibertá.

Pin It on Pinterest

Share This
X